رمضان میں بجلی اورگیس لوڈشیڈنگ کی وجہ سے عوام کو سخت مشکلات کا سامنا

ضلع کوہاٹ میں حکومتی احکامات کے باوجود رمضان میں بجلی و گیس لوڈشیڈنگ جاری ہے، شہری اور دیہی علاقوں میں بجلی و گیس لوڈشیڈنگ کے باعث عوام شدید پریشانی کا شکار ہیں۔ رمضان المبارک کے شروع میں ہی وفاقی و صوبائی حکومتوں کے عوام سے کیے گئے وعدے ہوا میں اڑ دیئے گئے، بجلی اورگیس لوڈشیڈنگ کی وجہ سے عوام کو سخت مشکلات کا سامنا کرنا پڑ رہا ہے۔ اہالیان علاقہ نے کہا ہے کہ سحری اور افطاری کے وقت بجلی اور گیس لوڈشیڈنگ ظلم اور سراسر زیادتی ہے، گذشتہ سالوں کی طرح اس سال بھی لوڈشیڈنگ زیادہ ہورہی ہے، بجلی اور گیس لوڈشیڈنگ کی وجہ سے اس ماہ مقدس میں بھی عوام کی زندگی اجیرن بنا دی گئی ہے۔ انہوں نے کہا کہ گیس حکام دعا کی بجائے بدعائیں سمیٹ رہے ہیں۔ خدارا اس کا تدارک کیاجائے، مسئلے کا فوری حل نکالا جائے ورنہ سڑکوں پر نکل آئیں گے۔